Surah Adh-Dhariyat Translated in Tamil

(புழுதிகளை எழுப்பி) நன்கு பரத்தும் (காற்றுகள்) மீது சத்தியமாக!

(மழைச்)சுமையைச் சுமந்து செல்பவற்றின் மீதும்,

பின்னர் (கடலில்) இலேசாகச் செல்பவற்றின் மீதும்,

(பூமியிலுள்ளோருக்கு விதியானவற்றை அல்லாஹ்வின்) கட்டளைப்படி பங்கிடுவோர் மீதும் சத்தியமாக

நிச்சயமாக நீங்கள் வாக்களிக்கப் படுவதெல்லாம் உண்மையேயாகும்.

அன்றியும், (நன்மை, தீமைக்குரிய) கூலி வழங்குவதும் நிச்சயமாக நிகழ்வதேயாகும்.

அழகு நிரம்பிய வானத்தின் மீது சத்தியமாக!

நீங்கள் (குர்ஆனைப் பற்றி) முரண்பட்ட பேச்சிலேயே இருக்கின்றீர்கள்.

அ(வ் வேதத்)திலிருந்து திருப்பப்பட்டவன் (இப்பொழுதும்) திருப்பப்படுகிறான்.

பொய் சொல்பவர்கள் அழிந்தே போவார்கள்.